TÜRKMEN OBA HOJALYK UNIWERSITETI ÝÜPEK ÝOLUNYŇ UNIWERSITETLER BILELEŞIGINE GOŞULDY
43Berkarar döwletiň täze eýýamynyň Galkynyşy döwründe hormatly Prezidentimiziň tagallasy bilen bilim ulgamyndaky döwlet syýasatynda halkara hyzmatdaşlygy ösdürmäge, ýurdumyzyň ýokary okuw mekdeplerini halkara derejeli ýokary okuw mekdepleriniň sanawlaryna goşmaga aýratyn üns berilýär. Bu ugurdaky işleriň netijesinde, «Pähim-paýhas ummany Magtymguly Pyragy» ýylynda S.A.Nyýazow adyndaky Türkmen oba hojalyk uniwersiteti «Times Higher Education» guramasynyň «World University Rankings 2025» sanawyna goşuldy. Durnukly ösýän, «ýaşyl» ýokary okuw mekdebi hökmünde uniwersitetimiz «UI GreenMetric World University Rankings» sanawynda 95 döwletden 1477 sany ýokary okuw mekdebiniň arasynda 474-nji orna mynasyp boldy.
Täze ýylyň bosagasynda gelip gowşan hoş habar — S.A.Nyýazow adyndaky Türkmen oba hojalyk uniwersitetiniň ýurdumyzda ilkinji bolup Ýüpek ýolunyň uniwersitetler bileleşiginiň (University Alliance of the Silk Road — UASR) agzalygyna kabul edilmegi bu üstünlikleriň üstüni ýetirdi.
Gahryman Arkadagymyzyň belleýşi ýaly, Beýik Ýüpek ýoly geçmişde yklymlary birleşdiripdir. Türkmenistan bu halkara söwda-medeni ýoluň ýüregi — hereketlendiriji güýji hökmünde taryhyň sahnasynda esasy orny eýeledi. Täzeden dikeldilýän Beýik Ýüpek ýolunyň üsti bilen alşylýan bilim-tejribeler, medeni gatnaşyklar bilelikde belent sepgitlere ýetmäge ýardam edýär.
Ýüpek ýolunyň uniwersitetler bileleşigi Hytaý Halk Respublikasynyň «Bir guşak, bir ýol» daşary syýasy başlangyjynyň çäginde döredilen bilim guramasy bolup, Beýik Ýüpek ýolunyň ugrunda ýerleşýän döwletleriň ykdysady ösüşini goldamak, bilim ulgamynda hyzmatdaşlygy ýola goýmak maksady bilen, 2015-nji ýylyň 22-nji maýynda döredildi. Bileleşigiň sekretariaty Hytaýyň Sian şäherindäki Sian Jiaotong uniwersitetinde ýerleşýär.
Sebitara we döwletara dostluk gatnaşyklaryny ösdürmek, parahatçylyk arkaly ösüşi goldamak maksady bilen, özara bähbitli bilim, medeni gatnaşyklary ýola goýmak, uniwersitetara alyş-çalyş etmek, zehinleri goldamak, bilelikde ylmy-barlag taslamalaryny alyp barmak bu halkara bileleşigiň esasy wezipeleridir.
Ýeri gelende bellesek, S.A.Nyýazow adyndaky Türkmen oba hojalyk uniwersitetiniň wekili geçen ýylyň 7 — 9-njy oktýabrynda Hytaý Halk Respublikasynyň Sian şäherinde Ýüpek ýolunyň uniwersitetler bileleşiginiň «Täze tehnologik özgertmeler döwründe ýokary bilimde ösüşler we innowasiýalar» atly forumyna gatnaşdy.
Ýurdumyzyň bilim ulgamyndaky şeýle uly üstünlikleriň başynda duran Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, belent başlary aman bolsun, eziz Diýarymyzy gülledip ösdürmekde alyp barýan beýik işleri rowaç alsyn!
