UNIWERSITETIMIZIŇ HALKARA ÜSTÜNLIGI
652024-nji ýylyň netijeleri esasynda neşir edilen «UI GreenMetric» dünýä uniwersitetleriniň reýtinginiň sanawyna ýurdumyzyň birnäçe ýokary okuw mekdepleri bilen birlikde S.A.Nyýazow adyndaky Türkmen oba hojalyk uniwersiteti hem girdi. Bu halkara sanawa 95 döwletden 1477 sany ýokary okuw mekdebi goşuldy. Şolaryň hatarynda S.A.Nyýazow adyndaky Türkmen oba hojalyk uniwersiteti dünýä uniwersitetleriniň reýtingi boýunça 474-nji orna mynasyp boldy. Bu görkeziji ýurdumyzdaky ýokary okuw mekdepleriniň bahalandyrmasy boýunça alnanda, Türkmenistanyň Oguz han adyndaky Inžener-tehnologiýalar uniwersitetinden soňra 2-nji ony eýeländigini görkezýär.
«UI GreenMetric World University Rankings» — uniwersitetleriň ekologiýa düzümlerini kämilleşdirmäge, şeýle hem daşky gurşawy goramak ulgamynda durnukly ösüşe ýardam etmek barada gazananlarynyň görkezijisidir. Hususan-da, dünýä uniwersitetlerine alty görkeziji, ýagny uniwersitet düzümleri we onuň ekologiýa täsiri, energiýa sarp edilişiniň we onuň tygşytlanylyşynyň görkezijileri, galyndylary gaýtadan işlemek, ekologiýa babatda bilim bermek we bu ugurda ylmy barlaglar, suwdan rejeli peýdalanmak, ulag syýasaty ýaly ugurlar boýunça baha berilýär.
Maglumat hökmünde bellesek, S.A.Nyýazow adyndaky Türkmen oba hojalyk uniwersiteti alyp barýan işiniň netijeliligi bilen tapawutlanyp, 2023-nji ýylyň netijelerine görä, bu reýtingde 456-njy orny eýeledi.
Görkezijini Indoneziýa uniwersiteti 2010-njy ýyldan bäri düzüp gelýär. Birinji görkezijä 96 uniwersitet gatnaşyp, häzirki döwürde olaryň sany ençeme esse artdy. Görkezijä gatnaşmak üçin uniwersitetleriň her ýyl berýän degişli maglumatlaryny garaşsyz halkara hünärmenler, alymlar seljerýärler. Maglumatlara baha bermek we utuklar esasynda uniwersitetleriň eýelän orny ählumumy sanawda beýan edilýär. Jemleýji netijeler dekabr aýynda çap edilýär.
Kadyr AMANOW,
S.A.Nyýazow adyndaky Türkmen oba hojalyk
uniwersitetiniň Tehnologiýalaryň transfer
merkeziniň başlygy.
