GAHRYMAN ARKADAGYMYZYŇ «HAKYDA GÖWHERI» ATLY KITABYNYŇ TANYŞDYRYLYŞ DABARASY GEÇIRILDI
5111-nji dekabrda S.A.Nyýazow adyndaky Türkmen oba hojalyk uniwersitetinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly täze kitabynyň tanyşdyrylyş dabarasy geçirildi.
Oňa ýokary okuw mekdebiniň professor-mugallymlary hem-de talyp ýaşlary gatnaşdylar. Dabarada bu ajaýyp kitabyň bagtyýar halkymyzyň ýankitabyna öwrüljek gymmatly eserdigi, onda merdana halkymyzyň asyrlaryň jümmüşine uzap gidýän şöhratly ýolunyň, dünýä ösüşine goşan ägirt uly goşandynyň, görnükli şahsyýetlerimiziň amala aşyran beýik işleriniň taryhy maglumatlar arkaly täsirli beýan edilýändigi nygtaldy. Kitapda agzybir türkmen halkynyň dünýä siwilizasiýasyna goşan goşandy baradaky gymmatly taryhy maglumatlara möhüm orun berilýär.
Gahryman Arkadagymyzyň «Hakyda göwheri» atly täze kitaby dürli ýaşdaky, dürli kärdäki watandaşlarymyzda, şol sanda professor-mugallymlardyr talyp ýaşlarda, obasenagat toplumynyň işgärlerinde, oba ýaşaýjylarynda hem uly gyzyklanma döredýär. Sebäbi onda eziz Watanymyzyň degresindäki müňläp türkmen öýüniň, obadyr etraplaryň, gözel şäherleriň bagt-u-döwletiň suratydygy, ak bugdaýyň watany bolan eziz Diýarymyzyň oba-kentleriniň gadymy we häzirki zaman galkynyşlary, aýdyň geljegi hakynda pelsepewi pikir ýöredilýär.
«Hakyda göwheri» kitabynyň bilim ulgamynda ýaş nesle bilim we terbiýe bermegiň ruhy-ahlak taýdan usuly esasydygy nygtaldy. Professor-mugallymlaryň Änew medeniýetini Türkmenistanyň ak bugdaýyň mekanydygy, hut şol medeniýetiň binýadynda müňýyllyklar geçenden soň, Altyndepe we Marguş ýaly gadymy siwilizasiýalaryň dörändigi baradaky hakykatdan ugur alyp öwretmekleri, ýurdumyzyň geçmişde Beýik Ýüpek ýolunyň ýüregi, hakyky hereketlendirijisi bolandygy baradaky hakykaty täze kitapda getirilýän ýerlikli mysallar arkaly çuňňur düşündirmekleri hakynda pikir alşyldy.
Gahryman Arkadagymyzyň «Hakyda göwheri» atly täze kitabynyň tanyşdyrylyş dabarasy ýokary okuw mekdebiniň «Altyn asyr» medeniýet merkeziniň çeper höwesjeňleriniň çykyşlary bilen dowam etdi.
Tanyşdyrylyş dabarasyna gatnaşyjylar milli maddy we ruhy gymmatlyklarymyz, mirasymyz hakynda maglumatlaryň paýhas düri bolan ajaýyp kitaby peşgeş berendigi üçin türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa müň keren alkyş aýtdylar. Berkarar döwletiň täze eýýamynyň Galkynyşy döwründe ýurdumyzyň obasenagat toplumyny ösdürmek ugrunda beýik işleriň, öňdengörüjilikli özgertmeleriň başynda duran Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, dünýä nusgalyk işleriniň hemişe rowaç bolmagyny arzuw etdiler.
