DIL BILEN DÜNÝÄNI GEZER
127Golaýda şeýle at bilen S.A.Nyýazow adyndaky Türkmen oba hojalyk uniwersitetiniň talyplarynyň arasynda iňlis dilinde bäsleşik geçirildi. Ol «Türkmenistanda daşary ýurt dillerini okatmagy kämilleşdirmegiň Konsepsiýasynda» öňde goýlan wezipelerden ugur alnyp guraldy.
Bäsleşik jemi 3 tapgyrdan ybarat bolup, talyplar onuň 1-nji tapgyrynda iňlis dilinde barlagnama soraglaryny çözmekde, 2-nji tapgyrynda düzme ýazmakda, 3-nji tapgyrynda bolsa saýlap alan hünärlerini iňlis dilinde tanyşdyrmakda bäsleşdiler. Bäsleşige ähli fakultetleriň talyplary işjeň gatnaşdylar. Olar iňlis dili dersine degişli grammatiki, logiki, edebi temalardan soraglara göreldeli jogap berdiler.
Talyplar iňlis dilindäki düzmelerinde «Türkmenistanyň oba hojalyk toplumynyň durnukly ösüşi», «2025-nji ýyl — Halkara parahatçylyk we ynanyşmak ýyly», «Pähim-paýhas ummany Magtymguly Pyragy», «Ekologiýa we daşky gurşawyň abadançylygy», «Bitaraplyk parahatçylygyň kepilidir» diýen temalar boýunça pikir-garaýyşlaryny giňişleýin beýan etdiler.
Gyzykly hem-de çekeleşikli geçen bäsleşikde talyplaryň iňlis dilinde pikirini beýan ediş ukybyna, özüni alyp barşyna, sözleýiş medeniýetine we görkezme esbaplarynyň taýýarlanyşyna baha berildi. Eminleriň gelen netijesine görä, şu talyplar ýeňiji diýlip yglan edildi:
Baş baýrak: Jahan Orazgeldiýewa, Oba hojalyk önümlerini gaýtadan işlemek fakultetiniň Miwe-gök önümlerini gaýtadan işlemek hünäriniň 4-nji ýyl talyby.
I orun: Maksat Ýazmuhammedow, Oba hojalygynyň mehanizasiýasy fakultetiniň Oba hojalygy (inžener-mugallymlary taýýarlamak) hünäriniň 4-nji ýyl talyby.
II orun: Myrat Orazmämmedow, Gidromeliorasiýa fakultetiniň Gidromeliorasiýa hünäriniň 2-nji ýyl talyby.
III orun: Ogulgözel Mommoliýewa, Agroekologiýa fakultetiniň Tokaý we seýil bag hojalygy hünäriniň 3-nji ýyl talyby.
Bäsleşikde ýeňiji bolan talyplar uniwersitetiň rektorlygynyň Hormat hatlary we Ilkinji ýaşlar guramasynyň sowgatlary bilen sylaglandy.
Ogulmaral PÄLIWANOWA,
S.A.Nyýazow adyndaky Türkmen
oba hojalyk uniwersitetiniň Weterinar
lukmançylygy fakultetiniň Weterinar
lukmançylygy hünäriniň 2-nji ýyl talyby.
