III AÇYK HALKARA INTERNET EKOLOGIÝA OLIMPIADASY ÜSTÜNLIKLERE BESLENDI
1460«Pähim-paýhas ummany Magtymguly Pyragy» ýylynda ýetip gelýän Halkara Bitaraplyk gününiň öňüsyrasynda bilim ulgamynda halkara çärelerdir bäsleşiklere giň gerim berilýär. 2024-nji ýylyň 5-nji dekabrynda S.A.Nyýazow adyndaky Türkmen oba hojalyk uniwersitetinde ýurdumyzyň we daşary ýurtlaryň ýokary okuw mekdepeleriniň talyplarynyň arasynda III açyk halkara internet ekologiýa olimpiadasy geçirildi.
Olimpiadanyň açylyş dabarasyna gatnaşyjylar, ilki bilen, bu ýerde ýaş alymlaryň we talyp ýaşlaryň taýýarlan ylmy-taslama işleri bilen tanyşdylar. Dabarada çykyş edenler oňa gatnaşyjylaryň ählisine uly üstünlikleri, bäsleşigiň netijeli geçmegini arzuw etdiler. Gutlag çykyşlarynda nygtalyşy ýaly, Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda daşky gurşawy goramak we ekologiýa abadançylygyny pugtalandyrmak babatda alnyp barylýan işler dünýä nusgalykdyr. Hormatly Prezidentimiz Serdar Berdimuhamedowyň 2023-nji ýylyň 1-nji dekabrynda Dubaý şäherinde BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatynda belent münberden Türkmenistan Ählumumy metan borçnamasyna goşulýandygyny resmi taýdan yglan etmegi dünýäde uly seslenme tapdy. Halkara internet ekologiýa olimpiadasyna gatnaşyjylar türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň öňňin — 3-nji dekabrda Saud Arabystany Patyşalygynyň Er-Riýad şäherinde Birleşen Milletler Guramasynyň Çölleşmä garşy göreşmek boýunça Konwensiýasyna gatnaşyjy taraplaryň 16-njy maslahatynyň (СOP16) çäklerinde geçirilen «Bitewi suw» sammitindäki çykyşynda öňe süren başlangyçlarynyň ähmiýetini nygtadylar.
Bellenilişi ýaly, ýurdumyzda ekologiýa syýasatyna, Durnukly ösüş maksatlaryna ýetmegiň wezipelerine aýratyn ähmiýet berilýän «ýaşyl» bilim ojaklarynyň halkara abraýy barha artýar. S.A.Nyýazow adyndaky Türkmen oba hojalyk uniwersiteti «Pähim-paýhas ummany Magtymguly Pyragy» ýylynda «Times Higher Education» guramasynyň «World University Rankings 2025» sanawyna goşuldy. Durnukly ösýän, «ýaşyl» ýokary okuw mekdebi hökmünde «UI GreenMetric World University Rankings» sanawynda mynasyp orun aldy.
Gahryman Arkadagymyzyň, Arkadagly Gahryman Serdarymyzyň nusgalyk göreldesinden ruhlanyp, ýurdumyzda durmuşa geçirilýän beýik işleri, alnyp barylýan ekologiýa syýasatyny ýaş nesilleriň arasynda giňden wagyz etmek, ýiti zehinli, maksada okgunly ýaşlary ýüze çykarmak, olaryň ekologik bilimlerini we endiklerini kämilleşdirmek, ylmy-döredijilik işine we halkara derejede geçirilýän ders bäsleşiklerine işjeň gatnaşmaklaryny, şeýle-de özara dostlukly hyzmatdaşlygy ýola goýmak maksady bilen, ýurdumyzyň hem-de daşary ýurtlaryň ýokary okuw mekdepleriniň talyplarynyň arasynda geçirilen açyk halkara internet ekologiýa olimpiadasy ýaşlaryň kämilleşmeginde, geljekki hünärmenleriň dünýägaraýşyny ösdürmekde möhüm ähmiýetli boldy.
Halkara bäsleşigiň açylyş dabarasy ýokary okuw mekdebiniň «Altyn asyr» medeniýet merkeziniň çeper höwesjeňleriniň çykyşlary bilen dowam etdi. Halkara Bitaraplyk gününiň öňüsyrasynda geçirilen dabarada dostlukly halklaryň milli medeniýetini we sungatyny açyp görkezýän aýdym-sazly çykyşlara giň orun berildi.
III açyk halkara internet ekologiýa olimpiadasyna daşary ýurtlaryň 30-synyň, ýagny Azerbaýjan, Awstraliýa, Amerikanyň Birleşen Ştatlary, Belarus Respublikasy, Beýik Britaniýa, Braziliýa, Çehiýa, Eýran Yslam Respublikasy, Fransiýa, Gazagystan, Germaniýa, Günorta Afrika, Günorta Koreýa, Gyrgyzystan, Hindistan, Horwatiýa, Hytaý Halk Respublikasy, Indoneziýa, Ispaniýa, Kanada, Malaýziýa, Meksika, Müsür, Niderlandlar Patyşalygy, Özbegistan, Pakistan, Russiýa, Täjigistan, Türkiýe, Ýaponiýa döwletleriniň 70-e golaý ýokary okuw mekdebiniň, şeýle hem ýurdumyzyň 25 ýokary okuw mekdebiniň 500 talyby gatnaşdy. Onda populýasiýalaryň ekologiýasy we biosferasy; adam ekologiýasy we häzirki zaman ekologiýa meseleleri; senagat ekologiýasy; ekologik monitoring; ekologiýa kanunçylygy we halkara guramalar bilen baglanyşykly ýumuşlar hödürlendi. Olary ýerine ýetirmek üçin talyp ýaşlara jemi 90 minut wagt berildi. Olimpiada gatnaşan talyplaryň işleri programma üpjünçiligi arkaly bahalandyryldy we toplanan ballaryň jemi boýunça netijeler jemlendi.
Hormatly Prezidentimiziň belleýşi ýaly, her bir döwletiň we jemgyýetiň sazlaşykly ösüşi ylym bilen aýrylmaz baglanyşyklydyr. Şoňa görä-de, Garaşsyz döwletimizde ylym ulgamyny kämilleşdirmäge, şol sanda tebigy we takyk ylmy ugurlary, ekologiýa bilimlerini ösdürmäge uly üns berilýär. Ýaşlarymyzyň ruhy-ahlak, medeni, aň-bilim we beden taýdan ösüşine uly ähmiýet berilýär. Çünki ylymly-bilimli, sagdyn ýaşlar döwletimiziň kuwwatly güýjüdir, nurana geljegidir. Bäsleşige gatnaşyjylar şeýle giň gerimli ylym-bilim özgertmeleriniň başynda duran Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, il-ýurt bähbitli, dünýä ähmiýetli işleriniň hemişe üstünliklere beslenmegini arzuw etdiler.
Bäsleşigiň netijeleri bilen şu ýerden tanşyp bilersiňiz!
Bägül ÝAZMYRADOWA,
S.A.Nyýazow adyndaky Türkmen
oba hojalyk uniwersitetiniň Agroekologiýa
fakultetiniň Ýüpekçilik hünäriniň 5-nji ýyl talyby.
