SPORTUŇ BIRNÄÇE GÖRNÜŞI BOÝUNÇA ÝOLDAŞLYK DUŞUŞYKLARY GURALDY
174Türkmenistanyň başlangyjy bilen Birleşen Milletler Guramasynyň Baş Assambleýasynyň 78-nji mejlisinde «Birleşen Milletler Guramasynyň oýunlary» atly Kararnamanyň kabul edilmegi, hormatly Prezidentimiziň bu möhüm ähmiýetli waka mynasybetli 2-nji noýabrda sport çäresini geçirmek, hemmeleriň bilelikde jemgyýet bolup, sagdyn durmuş ýörelgesine eýerip, Saglyk ýolundan geçmegi hakyndaky başlangyjy, «Bu çärede ýylyň dowamynda halkara ýaryşlarda gowy netije gazanyp, ýaşyl tugumyzy belentde parladan türgenlerimizi gazanan sport üstünlikleri bilen gutlalyň, mynasyp bolan sylaglaryny dabaraly ýagdaýda gowşuralyň!» diýen sözleri talyp ýaşlary täze üstünliklere, belent maksatlara ruhlandyrýar.
Şu mynasybetli hem-de «Pähim-paýhas ummany Magtymguly Pyragy» ýylynda sporty, sagdyn durmuş ýörelgelerini wagyz etmek maksady bilen, 31-nji oktýabrda S.A.Nyýazow adyndaky Türkmen oba hojalyk uniwersitetiniň açyk sport toplumynda «Gahryman Arkadagly, Arkadagly Gahryman Serdarly ýurtda sagdyn bedende sagdyn ruh» atly sportuň birnäçe görnüşleri boýunça ýoldaşlyk duşuşyklary geçirildi. Futbol boýunça Türkmen oba hojalyk uniwersitetiniň hem-de Türkmen döwlet binagärlik-gurluşyk institutynyň talyplar toparlary özara ýoldaşlyk duşuşygyny geçirdiler. Uniwersitetiň hem-de Aşgabat şäherindäki agrosenagat orta hünär okuw mekdebiniň talyplar toparlary woleýbol, basketbol, kiçi futbol, tennis boýunça özara ýoldaşlyk duşuşyklaryny geçirdiler.
Talyplaryň görkezme çykyşlary, welosipedli ýörişi hem sporta bolan söýgini wagyz etdi. Ýokary okuw mekdebiniň «Altyn asyr» medeniýet merkeziniň çeper höwesjeňleriniň çykyşlarynda sportuň hem-de sagdynlygyň ýurdy bolan eziz Diýarymyzyň belent ösüşleri wasp edildi. Ýaryşlaryň geçirilýän ýerinde uniwersitetiň professor-mugallymlarynyň we talyp ýaşlarynyň sportda gazanýan üstünliklerini, Türkmenistanyň sport ýurdy hökmünde dünýäde uly abraýa we hormata eýedigini görkezýän sergi gurlady.
Şeýle-de bu ýaryşlar Garaşsyz Döwletleriň Arkalaşygynyň Hökümet Baştutanlarynyň Geňeşiniň şu ýylyň maý aýynda paýtagtymyzda geçirilen mejlisinde Aşgabady «Arkalaşygyň täze sport mümkinçilikleriniň şäheri» diýip yglan etmek baradaky çözgüdiň biragyzdan kabul edilmegine, paýtagtymyzdaky Olimpiýa şäherçesiniň Tennis toplumynyň Aziýanyň Tennis federasiýasy tarapyndan «Tennis boýunça Aziýa sebitiniň okuw-türgenleşik merkezi» diýlip yglan edilmegine buýsanjyň nyşany boldy.
Mergen GALPAKOW,
S.A.Nyýazow adyndaky Türkmen
oba hojalyk uniwersitetiniň Oba
hojalygynyň mehanizasiýasy fakultetiniň
Oba hojalygy (inžener-mugallymlary
taýýarlamak) hünäriniň 1-nji ýyl talyby.
