«AKYL GIŇIŞLIGI» ATLY ZEHIN BÄSLEŞIGI ÜSTÜNLIGE BESLENDI
674Golaýda S.A.Nyýazow adyndaky Türkmen oba hojalyk uniwersitetinde «Akyl giňişligi» atly zehin bäsleşigi geçirildi. Oňa ýokary okuw mekdebimiziň her fakultetinden 6 adamdan ybarat 1 topar gatnaşdy.
«Pähim-paýhas ummany Magtymguly Pyragy» ýylynda aýratyn many-mazmuna eýe bolan bäsleşigiň sowallary, esasan, Magtymguly Pyragynyň ömri we döredijiligi hakynda, matematika, fizika, himiýa, biologiýa, geografiýa, türkmen dili we edebiýaty, taryh dersleri bilen baglanyşykly hem-de zehin sowallaryndan ybarat boldy. Bäsleşýän toparlaryň her duşuşygynda 11 sowal berlip, hersine pikirlenmek üçin 60 sekunt wagt berildi.
«Akyl giňişligi» zehin bäsleşiginde Agroekologiýa fakultetiniň topary 1-nji orny eýeledi we göçme kuboga mynasyp boldy. 2-nji orna Gidromeliorasiýa fakultetiniň, 3-nji orna bolsa Oba hojalygynyň mehanizasiýasy fakultetiniň toparlary eýe boldular.
Çekeleşikli geçen bäsleşik talyplaryň zehinini açmak, pikirleniş ukybyny ösdürmek, dünýägaraýşyny giňeltmek, ylym-bilime bolan höwesini artdyrmak babatda örän netijeli boldy.
Gadamdurdy HOJAMYRADOW,
S.A.Nyýazow adyndaky Türkmen
oba hojalyk uniwersitetiniň Weterinar
lukmançylygy fakultetiniň Weterinar
lukmançylygy hünäriniň 4-nji ýyl talyby.
