DÜÝEGUŞLARYŇ IDEDILIŞI BARADA YLMY-TEJRIBE DUŞUŞYGY GEÇIRILDI
627Golaýda S.A.Nyýazow adyndaky Türkmen oba hojalyk uniwersitetinde professor-mugallymlaryň, talyp ýaşlaryň, Türkmenistanyň Senagatçylar we telekeçiler birleşmesiniň agzalarynyň gatnaşmagynda nobatdaky ylmy-tejribe duşuşygy geçirildi. Onuň temasy düýeguşlary ösdürip ýetişdirmek hem-de bu pudagyň ýurdumyzdaky geljegi, ähmiýeti dogrusynda boldy. Ylmy-tejribe duşuşygynyň başynda S.A.Nyýazow adyndaky Türkmen oba hojalyk uniwersitetiniň Maldarçylyk kafedrasynyň müdiri Saparmyrat Annamuhammedow düýeguşlaryň gelip çykyşynyň taryhy, beden gurluşy, umumy biologiýasy barada çykyş etdi.
Mugallymyň aýtmagyna görä, düýeguşlar uçmaýandygy sebäpli, olaryň döş myşsasy ýeterlik derejede ösmedik ýagdaýda bolup, süňk skeletleri pnewma häsiýetli däldir. Bu guşlaryň aýaklary güýçli we uzyn bolup, ýelekleri ýumşakdyr. Olar ýabany görnüşde Afrikanyň gury tokaýsyz ýa-da seýrek ösen tokaýlyklarynda giňden ýaýrandyr.
Düýeguşlar düýeler ýaly çöllük ýerlerde ýaşamaga, uzak aralyklary ýöräp geçmäge ukyply bolýarlar. Uly ýaşly erkek düýeguşlaryň diri agramy 120-150 kg, mäkiýan düýeguşlar bolsa 100-120 kg aralygynda, boýlary bolsa 180-230 sm töwereginde bolýar. Düýeguş ýumurtgasynyň uzynlygy 150 mm, agramy 1,5-2 kg aralygynda bolup, gabygynyň örän galyňlygy bilen tapawutlanýar.
Nobatdaky ylmy-tejribe duşuşygynyň dowamynda Türkmenistanyň Senagatçylar we telekeçiler birleşmesiniň müdiriýet agzasy Şamämmet Annaýew ýurdumyzdaky ýörite hojalyklarda düýeguşlaryň idedilişi, ösdürip ýetişdirilişi, şeýle hem bu ösüp barýan täze pudagyň geljekdäki ähmiýeti dogrusynda çykyş etdi. Hünärmeniň bellemegine görä, düýeguşlar ýurdumyzyň howa şertlerine doly uýgunlaşyp, häzirki wagtda olary köpeltmekde alnyp barylýan işler özüniň oňyn netijelerini berýär. Dürli ýaşdaky düýeguşlar ýörite iýmit rasionyna laýyklykda iýmitlendirilýär. Bu bolsa olaryň agramynyň kadaly derejede saklanmagyna, birnäçe kesellerden goramaga mümkinçilik berýär. Düýeguşlaryň etiniň özboluşly tagamy bolup, ýumurtgasy ýokumlylygy bilen tapawutlanýar.
Geçirilen ylymlar gününiň maslahatynyň ahyrynda duşuşyga gatnaşyjylar tarapyndan birnäçe sowal-jogap alşyldy.
Täzegül ÝUSUPOWA,
S.A.Nyýazow adyndaky Türkmen
oba hojalyk uniwersitetiniň oba
hojalygynyň guralyşy we dolandyrylyşy
kafedrasynyň mugallym-öwrenijisi.
