TÄZE OKUW ÝYLYNA BADALGA BERILDI
890Şu gün — 1-nji sentýabrda S.A.Nyýazow adyndaky Türkmen oba hojalyk uniwersitetinde Bilimler we talyp ýaşlar güni hem-de 2023-2024-nji täze okuw ýylynyň başlanmagy mynasybetli, «Arkadag Serdarly bagtyýar ýaşlar ýyly» şygary bilen baýramçylyk nyzamy, şeýle-de şol temada ilkinji okuw sapaklary geçirildi.
Täze okuw ýylynyň bosagasynda uniwersitetde «Bilimli nesil — kuwwatly Watan» atly professor-mugallymlaryň, aspirantlaryň, hünärmenleriň we talyplaryň ylmy-amaly maslahaty geçirildi.
Bilimler we talyp ýaşlar güni mynasybetli baýramçylyk nyzamynda Döwlet senasy ýaňlandy, hormatly Prezidentimiz Serdar Berdimuhamedowyň täze okuw ýylynyň başlanmagy mynasybetli Türkmenistanyň mekdep okuwçylaryna, talyp ýaşlaryna, mugallymlaryna we bilim işgärlerine iberen Gutlagy okaldy, gutlag sözleri, çykyşlar diňlendi.
Soňra uniwersitetiň 1-nji ýyl talyplaryna talyplyk şahadatnamasynyň nyşany, simwoliki açar dabaraly gowşuryldy, 2023-2024-nji okuw ýylynyň başlanýandygyny aňladýan ilkinji jaň kakyldy. Dabarada uniwersitetiň «Altyn asyr» medeniýet merkeziniň döredijilik toparynyň talyplary buýsançly aýdymlary ýerine ýetirdiler.
Ýazmyrat HOJYMYRADOW,
S.A.Nyýazow adyndaky Türkmen
oba hojalyk uniwersitetiniň weterinar
lukmançylygy fakultetiniň atçylyk
taýýarlyk ugrunyň 4-nji ýyl talyby.
