Uniwersitetimizde “Arkadag şäheri-geljegiň şäheri” atly kitabyň tanyşdyrylyş dabarasy geçirildi
1154Berkarar döwletiň täze eýýamynyň Galkynyşy döwründe Arkadagly Serdarymyzyň parasatly ýolbaşçylygynda ýurdumyzyň ykdysadyýetiniň ähli ugurlarynda uly ösüşler gazanylýar.
Gahryman Arkadagymyz tarapyndan başy başlanyp, Berkarar döwletiň täze eýýamynyň Galkynyşy döwründe Arkadagly Serdarymyz tarapyndan üstünlikli durmuşa geçirilýän ýurdumyzyň şäherlerini, obalaryny, şäherçelerini, etraplardaky şäherlerini we etrap merkezlerini ösdürmek bilen baglanyşykly toplumlaýyn işler üstünlikli durmuşa geçirilýär.
Gahryman Arkadagymyz tarapyndan başy başlanan Arkadag şäheriniň gurluşygynyň birinji tapgyry ýokary derejede amala aşyryldy. Ol sebitde iň iri şähergurluşyk taslamalarynyň biri bolmak bilen onuň birinji tapgyrynda binalardyr desgalaryň 336-sy, şol sanda ähli amatlyklary özünde jemleýän ýaşaýyş jaýlary, dünýäniň iň kämil enjamlary bilen üpjün edilen çagalar sagaldyş-dikeldiş merkezi, hassahanalar, mekdeplerdir çagalar baglary, edara binalary, inženerçilik ulgamlary we beýleki möhüm ähmiýetli desgalar gurlup ulanmaga berildi.
“Arkadag şäheri — geljegiň şäheri” atly täze neşiriň tanyşdyrylyş dabarasy S.A.Nyýazow adyndaky Türkmen oba hojalyk uniwersitetinde professor mugallymlaryň we talyp ýaşlaryň gatnaşmagynda geçirildi. Dabarada çykyş edenler täze kitapda bu ajaýyp şäheriň özboluşly aýratynlyklarynyň, tebigy gözelligiň we döwrebaplygyň sazlaşygynyň çeper beýan edilýändigi hakynda täsirli gürrüňleri berdiler. Ýokary çaphana usulynda neşir edilen bu täze kitabyň üç dilde taýýarlanylmagy onuň giň okyjylar köpçüligi üçin niýetlenendigini görkezýär. Ol okyjylar köpçüligi, tutuş halkymyz tarapyndan Arkadag şäheriniň açylyş dabarasyna mynasyp sowgat hökmünde kabul edilip, şäheriň birinji tapgyrynda ýerine ýetirilen işler barada giňişleýin maglumatlary özünde jemleýär.
“Arkadag şäheri — geljegiň şäheri” atly täze kitaby tanyşdyrmak maksady bilen geçirilen dabarada tutuş halkymyzyň göwnüni ganatlandyran Arkadag şäherine bolan egsilmez buýsanjy görmek bolýar. Arkadag şäherindäki desgalaryň özboluşly aýratynlyklary, ýaşyl zolaklaryň innowasion mazmuny, “Akylly” şäher konsepsiýasynyň, sanly we elektron tehnologiýalaryň ulanylmagy häzirki zaman şäher gurluşyk tejribesiniň naýbaşy derejesini özünde jemleýär.
Ýaş nesilleriň sagdyn we bagtyýar durmuşda ýaşamagy üçin beýik işleri durmuşa geçirýän Gahryman Arkadagymyzyň, Arkadagly Serdarymyzyň janlary sag, ömürleri uzak bolsun! Alyp barýan halk bähbitli, döwlet ähmiýetli işleri rowaçlyklara beslensin!
Amanmyrat Ýaryýew,
S.A.Nyýazow adyndaky Türkmen oba hojalyk uniwersitetiniň
Dokma önümçiligi kafedrasynyň mugallymy
