“MILLI MEDENIÝETIMIZ WE SUNGATYMYZ HALKYMYZYŇ RUHY BAÝLYGYDYR” atly ylmy-amaly maslahat geçirildi
645Gahryman Arkadagymyz: “Magtymguly Pyragy türkmen halkynyň taryhynyň iň çylşyrymly döwründe ýaşan, agzybirlik, garaşsyzlyk, özbaşdak döwlet gurmak ýaly beýik maksatlara öz döredijiligi bilen gulluk eden ynsanperwer şahyrdyr” diýip belleýär.
Türkmen paýhasynyň belent nusgasy bolan Magtymguly Pyragynyň 300 – ýyllyk ýubileý toý-dabarasyny halkara derejesinde bellemek hakyndaky kabul edilen karar bolsa, Garaşsyz, hemişelik Bitarap Türkmenistan döwletimiziň we akyldar Magtymguly Pyragynyň älem içre at-abraýyny has-da belende göterdi. Munuň özi Berkarar döwletiň täze eýýamynyň Galkynyşy döwründe Arkadagly Serdarymyzyň parasatly ýolbaşçylygynda halkymyzyň ruhy-medeni gymmatlyklaryny hemmetaraplaýyn öwrenmek işinde täze belent sepgitlere ýetendiginiň aýdyň mysalydyr.
Medeniýet we sungat işgärleriniň hem-de Magtymguly Pyragynyň şygryýet güni mynasybetli S.A.Nyýazow adyndaky Türkmen oba hojalyk uniwersitetinde “Milli medeniýetimiz we sungatymyz halkymyzyň ruhy baýlygydyr” atly ylmy-amaly maslahat geçirildi.
Maslahata uniwersitetimiziň professor mugallymlary we talyp ýaşlary gatnaşyp, türkmen medeniýeti we Magtymguly Pyragynyň döredijiligi barada giň mazmunly çykyşlar etdiler. Çykyş edenler häzirki wagtda milli medeniýetimiz halkara gatnaşyklary babatda hem işjeň ösdürilýändigini, Garaşsyz, hemişelik Bitarap Türkmenistanyň medeniýet we sungat ussatlary dünýäniň dürli ýurtlarynda üstünlik bilen çykyş edip, halklary ýakynlaşdyryp, döwletara gatnaşyklarynyň ruhy esasyny döredýändiklerini bellediler.
Çykyşlaryň dowamynda Magtymguly Pyragynyň 300 ýyllyk ýubileý toýy halkara derejesinde toýlanýan günlerinde şahyryň köpöwüşginli edebi mirasy adamzat üçin bimöçber hazyna bolup hyzmat edýänligini nygtadylar. Maslahatda Magtymguly Pyragynyň arassa ahlaklylyk, ynsan gözelligine we kämilligine, ruhy arassalyga, wyždan päkizeligine bagyşlap ýazan birnäçe goşgulary okaldy.
Ýaş dörediji zehinleri höweslendirmek we goldamak hem-de Magtymguly Pyragynyň döredijiligini içgin öwrenmäge giň şerleri döredip berýän Gahryman Arkadagymyzyň, Arkadagly Serdarymyzyň janlary sag bolsun! Ömürleri uzak bolsun! Alyp barýan umumadamzat ähmiýetli işleri rowaç alsyn!
Melewşe Karliýewa,
S.A.Nyýazow adyndaky Türkmen oba hojalyk
uniwersitetimiziň mugallymy
