Uniwersitetimizde geçirilen ylmy-tejribe duşuşygy oba hojalyk ekinleriniň tohumçylygy hakynda
510Hormatly Prezidentimiziň tagallasy bilen ýurdumyzyň oba hojalyk pudagynda giň gerimli işler amala aşyrylýar. Ýokary hasyl almakda oba hojalyk ekinleriniň tohumçylygyna hem uly üns berilip, bu ugurda daşary ýurt hyzmatdaşlary bilen bilelikde işler alnyp barylýar.
Häzirki wagtda ýurdumyzda pagta, bugdaý ýaly strategiki ekinlerden başga-da mekgejöwen, günebakar ýaly ekinlere hem köp üns berilýär. Sebäbi bu ekinler diňe bir azyk önümçiliginde däl-de eýsem oba hojalyk mallary üçin hem gymmatly ot-iýmlik hasaplanylýar. Bular dogrusynda S.A.Nyýazow adyndaky Türkmen oba hojalyk uniwersitetimizde ylmy-tejribe duşuşygy geçirilip, oňa Türkmenistanyň senagatçylar we telekeçiler birleşmesiniň agzalary, professor-mugallymlar, talyp ýaşlar we beýleki myhmanlar gatnaşdylar. Duşuşykda ilki bilen Türkmenistanyň senagatçylar we telekeçiler birleşmesiniň agzasy, telekeçi Seýitmyrat Ödeniýazow çykyş etdi. Ol öz çykyşynda Türkiýäniň “MAÝ” tohumçylyk kärhanasynyň alyp barýan işleri we ýurdumyz bilen hyzmatdaşlygy hakynda gürrüň berdi. Hünärmeniň aýtmagyna görä kärhana mekgejöwen, günebakar, pagta ýaly ekinleriň tohumlarynyň ýylda 36000 tonnasy öndürmäge ukyply bolup, her ýyl bu ekinleriň bol hasyl berýän tohumlary döredilýär. Häzirki wagtda kärhananyň döreden ARMADA, METEOR, 72MAÝ80 ýaly tohumlary ýer ýüzünde uly islegden peýdalanýar. Aýratynam mekgejöweniň 72MAÝ80 tohumyndan her gektardan ýurdumyzda 14-15 tonna çenli azyklyk mekge, mallara silos üçin bolsa her gektardan 80-90 tonna hasyl alynýar. Hususy kärhanada öndürilýän agramy 16 kg barabar bolan haltalara gaplanan tohumlar zyýankeşlere derman serişdeleri bilen işlenilýär hem-de daşary ýurtlara eksport edilýär.
Soňra ylmy-tejribe duşuşygyny Türkmenistanyň senagatçylar we telekeçiler birleşmesiniň agzasy, telekeçi Aýnazar Gulmyradow dowam etdirdi. Ol öz çykyşynda oba hojalyk ekinleriniň bol hasyl almagy üçin ekinleri zyýankeşlerden goramagyň usullaryny we bu ugurda ulanylýan adam saglygyna zyýansyz derman serişdelerini aýtdy. Şeýle-de hünärmen ýokary hasyl almakda her ekiniň öz talabynyň bardygyny, olar üçin zerur bolan makro we mikro elementleriň mukdaryny belläp geçdi.
Çykyşlar tamamlanandan soňra duşuşyga gatnaşyjylar öz soraglaryny berip hünärmenler bilen pikir alyşdylar. Täsirli geçen ylmy-tejribe duşuşygynda çykyş edenlere minnetdarlyk bildirilip, indiki duşuşygyň ýurdumyzda gara mallardan mermer etini almagyň tehnologiýasy barada geçirilmegini teklip berdiler.
Serdar Myratdurdyýew,
S.A.Nyýazow adyndaky Türkmen
oba hojalyk uniwersitetiniň mugallymy
