Döwletli ilimizde myhman sarpasy
497Ylmyň we tehnologiýanyň iň soňky gazananlary bilen aýakdaş barýan eziz diýarymyzda ykdysadyýetimiziň ähli pudaklarynda, şol sanda ylym-bilim ulgamynda halkara tejribelere uly orun berilýär. Bu babatda Arkadagly Serdarymyz tarapyndan giň möçberli ähmiýetli işler amala aşyrylýar.
Eziz watanymyzda sagdynlygy, bilim we sport ulgamlarynyň ösüşlerini dünýä ýaýmak we olary dünýä derejesine çykarmak boýunça ýaňy ýakynda Türkmenistanyň söwda senagat edarasynyň sergiler köşgünde “Saglygy goraýyş, bilim we sport Berkarar döwletiň täze eýýamynyň Galkynyşy döwründe” ady bilen halkara sergi we ylmy maslahaty geçirildi. Bu sergide ýurdumyzyň we daşary ýurtlaryň degişli guramalary özleriniň soňky gazananlaryny özlerine bellenilen pawilionlarda görkezdiler. Uly dabara, şatlyk-şowhuna beslenen bu sergi birnäçe gün öz işini dowam etdirdi. Elbetde, bu abraýly halkara çärä biziň uniwersitetimiz hem gatnaşdy. Halkara sergidäki ýörite pawilionda uniwersitetimiziň professor-mugallymlary we talyp ýaşlary ylymda we tehnologiýada döwrebap gazananlaryny ussatlyk bilen beýan etdiler. Daşary ýurtlardan gelen myhmanlar halkara derejesinde geçirilen bu sergä ýokary derejede baha berdiler.
Serginiň çäklerinde uniwersitetimize Özbegistan respublikasynyň Daşkent şäherinde ýerleşýän Oba hojalygyň irrigasiýasy we mehanizasiýasy uniwersitetiniň professory Ilhom Begmatow ýörite çakylyk boýunça uniwersitetimizde iş saparda boldy. Myhman uniwersitetimizde alnyp barylýan ylmy-barlag işlerine we geçirilýän okuw sapaklaryna ýokary baha berip, geljekde ikitaraplaýyn hyzmatdaşlygyň has-da berkejekdigine ynam bildirdi. Iş saparynyň çäklerinde professor Ilhom Begmatow uniwersitetimiziň talyplary we professor-mugallymlary bilen suwaryş ulgamlary we oba hojalygyň irrigasiýasy boýunça umumy okuw sapaklaryny geçdi. Şeýle-de uniwersitetimiziň ýolbaşçy düzümi bilen myhmanyň arasynda iş maslahaty geçirilip, onda Daşkent şäheriniň Oba hojalygyň irrigasiýasy we mehanizasiýasy uniwersiteti bilen S.A.Nyýazow adyndaky Türkmen oba hojalyk uniwersitetiniň arasynda baglaşylan ähtnamanyň möhletini uzaltmak we özara hyzmatdaşlygy giňeltmek boýunça ylalaşyk baglaşyldy. Myhmanyň aýtmagyna görä, bu onuň ýurdumyza eýýäm üçünji gezek iş sapary bolup, her gezekde Watanymyzyň tanalmaz derejede ähli babatda gülläp ösýändigini aýratyn belläp geçdi.
Ýunus Kadyrow
S.A.Nyýazow adyndaky
Türkmen oba hojalyk uniwersitetiniň
Oba hojalygyň ykdysadyýeti we dolandyrylyşy
fakultetiniň mugallymy
