Ýeriň tekiz bolsa hasyl bol bolar
560Häzirki wagtda ýurdumyzyň oba hojalyk pudagynda zähmet çekýän ekerançy-daýhanlar hasyl toýuna özleriniň zähmet ýeňişleri bilen barýarlar. Zähmet ýeňişi bolsa ilkinji nobatda toprakdan bol hasyl almaklykdan ybaratdyr. Topragyň hasyllylygyny ýokarlandyrmagyň şertleriniň biri, ony tekizlemekdir. Diňe şeýtmek bilen biz, topraga berilýän suwy we dökünleri deň derejede paýlap bilýäris. Bu işi amala aşyrmaklyk bolsa ylmy tejribeleri talap edýär.
S.A.Nyýazow adyndaky Türkmen oba hojalyk uniwersitetinde her hepdäniň şenbe güni geçirilýän ylmy-amaly maslahatyň bu gezegi “Oba hojalyk ekinleriniň meýdan ýerlerini tekizlemegiň usullary” ady bilen geçirildi. Bu maslahata oba hojalygymyzda zähmet çekýän daýhanlardyr ekerançylar, telekeçiler, professor-mugallymlar we talyp ýaşlar gatnaşdylar. Ekerançylyk pudagynda möhüm çäreleriň biri bolan topragy tekizlemeklige bagyşlanan ylmy-amaly maslahatda ilkinji bolup, uniwersitetimiziň Oba hojalyk maşynlary kafedrasynyň uly mugallymy Esenmyrat Şagulyýew çykyş etdi. Tejribeli mugallym özüniň çykyşynda ekin ýerlerini tekizlemegiň gadymy we häzirkizaman usullary we onda ulanylýan enjamlar hakynda gürrüň berdi. Şeýle-de mugallym bu ugurda talyplara ýolbaşçylyk edip, alyp barýan ylmy-barlag işleri hakynda durup geçdi.
Ylmy-amaly maslahaty ABŞ-nyň abraýly kompaniýalarynyň biri bolan JOHN DEERE kompaniýasynyň Türkmenistandaky edarasynyň hünärmeni, tehniki ylymlarynyň kandidaty Öwezgeldi Kakabaýew dowam etdirdi. Tejribeli hünärmen özüniň çykyşynda kompaniýanyň ýurdumyzda alyp barýan işleri, getirilýän häzirkizaman tehnikalar barada gürrüň berdi. Şeýle-de JOHN DEERE kompaniýasynyň ekin meýdanlaryny tekizlemeklik üçin döreden häzirkizaman tehnikalary we tehnologiýalar ulgamlary hakynda gyzykly we peýdaly maglumatlary ýetirdi. Maslahatyň ahyrynda oňa gatnaşyjylar çykyş edenlere minnetdarlyk bildirip, indiki ylmy-amaly maslahatyň miweli baglary damjalaýyn suwarmaklyk hakynda bolmagyny teklip berdiler.
Gurbangül Jangeldiýewa
S.A.Nyýazow adyndaky
Türkmen oba hojalyk uniwersitetiniň
Weterinar lukmançylygy fakultetiniň 5-nji ýyl talyby
