Halkara tejribeler hakynda onlaýn maslahat
495Ylmyň we tehnologiýanyň sagatsaýyn ösmegi bu adamyň zähmetiniň ýeňilleşmegine ep-esli derejede öz täsirini ýetirýär. Sebäbi indi, biz sanly ulgam arkaly oturan ýerimizden köp işleri ýerine ýetirip bilýäris. Diňe hojalyk maksatlary üçin däl-de eýsem, ylym-bilim, ykdysadyýetde hat-da saglygy goraýyş we oba hojalykda hem sanly ulgamyň ähmiýeti örän uludyr.
Häzirki wagtda ýurdumyzyň ykdysadyýetiniň dürli pudaklaryny şol sanda oba hojalyk we bilim ulgamlaryny sanlylaşdyrmak boýunça giň gerimli işler amala aşyrylýar. Ylym-bilim ulgamyna halkara tejribeleri ornaşdyrmak maksady bilen dünýäniň ösen ýurtlarynyň abraýly ýokary okuw mekdepleri we iri kompaniýalary bilen onlaýn maslahatlar yzygiderli geçirilýär. Şu maksat bilen 2022-nji ýylyň oktýabr aýynyň 3-5 aralygynda Türkmenistanyň Bilim ministrliginiň gurnamagynda we Amerikanyň Birleşen Ştatlarynyň Halkara ösüş agentliginiň hyzmatdaşlyk etmeginde göni wideoaragatnaşyk arkaly onlaýn maslahat geçirildi. Oňa ýurdumyzyň käbir ýokary okuw mekdepleriniň şol sanda biziň uniwersitetimiziň hem mugallymlar düzümi gatnaşdy.
Ylmy-barlag işleri täjirleşdirmeklige bagyşlanan bu maslahaty Garwardyň biznes okuw mekdebiniň we Garward döwlet dolandyryş mekdebiniň uçurymy jenap Kewin Mörfi alyp bardy. Ol maslahatyň ilkinji güni ylmy-barlag işlerini täjirleşdirmekdäki özüniň baý iş tejribesini maslahata gatnaşyjylar bilen paýlaşdy. Maslahatyň ikinji we üçünji günlerinde ABŞ-nyň Perdýu, Tehas A&M uniwersitetleriniň hem-de Beýik Britaniýanyň Kent, Korolewa Mariýa, Nottingem uniwersitetleriniň professorlary çykyş etdi. Olaryň çykyşlary esasan senagat pudagy tarapyndan maliýeleşdirilýän ylmy barlaglary amala aşyrmagyň usullary, ylmy barlag işlerini täjirleşdirmegiň ýollary, uniwersitetleriň ykdysadyýetdäki innowasiýalara itergi bermek eýeleýän orny dogrusynda boldy. Onlaýn maslahatda çykyş eden professor mugallymlar häzirki wagtda ýurdumyzyň bilim ulgamynda Hormatly Prezidentimiz tarapyndan alnyp barylýan işlere ýokary baha berip, geljekde özara hyzmatdaşlygyň ösjekdigine ynam bildirdiler.
Şöhrat Poladow
S.A.Nyýazow adyndaky
Türkmen oba hojalyk uniwersitetiniň
Weterinar lukmançylygy fakultetiniň 1-nji ýyl talyby
