AZIÝA ÖSÜŞ BANKYNYŇ WEKILLERI BILEN DUŞUŞYK GEÇIRILDI
4614-nji maýda S.A.Nyýazow adyndaky Türkmen oba hojalyk uniwersitetinde «Merkezi Aziýada sebitleýin ykdysady hyzmatdaşlyk (CAREC)» maksatnamasynyň «ýaşyl» başarnyklaryň ösüşini pugtalandyrmak boýunça taslamasynyň çäklerinde ýurdumyzda iş saparynda bolýan Aziýa ösüş bankynyň Merkezi we Günbatar Aziýa bölüminiň wekilleri bilen duşuşyk geçirildi. Onda «ýaşyl» başarnyklaryň we deňhukukly geçiş ulgamynyň hünär we ýokary bilim syýasatyna we strategiýalaryna ornaşdyrylmagyny mundan beýläk-de goldamak boýunça meýilleşdirilen çäreler ara alnyp maslahatlaşyldy. S.A.Nyýazow adyndaky Türkmen oba hojalyk uniwersitetinde geçirilen duşuşyga Aziýa ösüş bankynyň Merkezi we Günbatar Aziýa bölüminiň sebitleýin hyzmatdaşlyk boýunça baş hünärmeni Zulfiýa Karimowa, maslahatçysy Liliýa Kaçkinbaýewa, milli maslahatçysy Waleriýa Danilçenko dagy gatnaşdy. Onda ýokary hünär bilimi ulgamynda milli strategiýalaryň, okuw meýilnamalarynyň we okuw maksatnamalarynyň howanyň üýtgemegi boýunça milli borçnamalara, ykdysady pudaklaryň «ýaşyl» başarnyklar, adalatly geçiş babatdaky zerurlyklaryna laýyk gelmegi babatda seljerme netijeleri ara alnyp maslahatlaşyldy.
Duşuşykda nygtalyşy ýaly, CAREC sebitinde oba hojalyk ugurly ýokary okuw mekdepleri bilen baglanyşykly hyzmatdaşlyk, şol sanda talyplaryň we mugallymlaryň akademiki alyş-çalşyny ösdürmek, bilelikde ylmy makalalary, işleri taýýarlamak, halkara maslahatlary geçirmek, gysga möhletli okuwlary guramak, täze dersler boýunça bilim standartlaryny işläp taýýarlamak ýaly ugurlar boýunça gatnaşyklar ileri tutulýar. Bu ugurlardaky başlangyçlar «ýaşyl» başarnyklary ösdürmek, oba hojalygynda durnuklylygy üpjün etmek hem-de howanyň üýtgemegine uýgunlaşmak bilen baglanyşykly meseleleriň çözgütlerine gönükdirilýär. Geljekde döredilmegi göz öňünde tutulýan «ýaşyl» başarnyklar boýunça sebitara merkez öz işini «ýaşyl» tehnologiýalar, howanyň üýtgemegi, oba hojalygynda durnukly ösüş hem-de täze innowasion çözgütler boýunça ylmy-barlag işlerini alyp barmak arkaly amala aşyrar. Bellenilişi ýaly, halkara hyzmatdaşlygyň çäklerinde, S.A.Nyýazow adyndaky Türkmen oba hojalyk uniwersitetiniň professor-mugallymlarynyň hem gatnaşmagynda talyplarda «ýaşyl» başarnyklar we durnukly ösüş baradaky giňişleýin düşünjäni kemala getirmek maksady bilen okuw moduly işlenip taýýarlanyldy. Şeýle-de şu ýylyň 31-nji marty — 2-nji apreli aralygynda ýurdumyzyň wekiliýetiniň düzüminde S.A.Nyýazow adyndaky Türkmen oba hojalyk uniwersitetiniň mugallymynyň Türkiýäniň Stambul şäherinde iş saparynda bolup, «Merkezi Aziýada sebitleýin ykdysady hyzmatdaşlyk (CAREC)» maksatnamasynyň Başarnyklary ösdürmek boýunça iş toparynyň üçünji mejlisine hem-de okuw maslahatyna gatnaşmagynyň ähmiýeti bellenildi.
Duşuşyga gatnaşyjylar özara bähbitli gatnaşyklaryň gülläp ösmegini, dowamat-dowam bolmagyny arzuw etdiler hem-de munuň üçin giň mümkinçilikleri döredýän Gahryman Arkadagymyza, Arkadagly Gahryman Serdarymyza alkyş sözlerini beýan etdiler.
