«DURNUKLY ÖSÜŞ MAKSATLARYNY DURMUŞA GEÇIRMEKDE EKOLOGIÝANYŇ ORNY» ATLY MASLAHAT GEÇIRILDI
2685-nji iýunda ekologiýa abadançylygyna gönükdirilen möhüm halkara sene mynasybetli S.A.Nyýazow adyndaky Türkmen oba hojalyk uniwersitetinde «Halkara parahatçylyk we ynanyşmak ýylynda daşky gurşawy goramak boýunça öňde duran wezipeler we halkara hyzmatdaşlyk» atly ylmy-amaly maslahatyň «Durnukly ösüş maksatlaryny durmuşa geçirmekde ekologiýanyň orny» atly ikinji bölüminiň mejlisi geçirildi. Oňa gatnaşyjylar, ilki bilen, uniwersitetiň Medeniýet merkezinde ylmy-taslamalar, ýurdumyzda daşky gurşawy, biodürlüligi goramak boýunça alnyp barylýan işler bilen tanyşdyrýan sergiler bilen tanyşdylar.
Maslahatda «Ekologiýa abadançylygy — bagtyýar ýaşaýşyň özeni», «Suwaryşyň innowasion usulyndan peýdalanylanda ekologiýa täsirini öwrenmek», «Tokaýlaryň ekologiýadaky tutýan orny», «Ýurdumyzyň ekologiýa howpsuzlygyny üpjün etmekde halkara hyzmatdaşlyk», «Ýurdumyzyň biodürlüliginiň baýlaşmagynda «Altyn asyr» Türkmen kölüniň ähmiýeti», «Daşky gurşawy goramak boýunça ýurdumyzda amala aşyrylýan çäreler», «Ýurdumyzyň ösümlik we haýwanat dünýäsini goramakda alnyp barylýan işler», «Ýaşlaryň ekologiýa medeniýetini ýokarlandyrmakda ekologik bilimiň we terbiýäniň orny» atly temalarda çykyşlar diňlendi.
Çykyşlarda nygtalyşy ýaly, daşky gurşawy goramak, ekologiýa howpsuzlygyny üpjün etmek, tebigy serişdelerden rejeli peýdalanmak, ony geljekki nesillerimize tebigy durkunda we baýlaşdyryp, miras goýmak meselesi «Howanyň üýtgemegi boýunça Türkmenistanyň Milli strategiýasynda», «Türkmenistanyň 2021 — 2025-nji ýyllar üçin Milli tokaý maksatnamasynda», «Türkmenistanyň 2021 — 2025-nji ýyllar üçin Aral milli maksatnamasynda» öz beýanyny tapýar.
Maslahata gatnaşyjylar Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, il-ýurt bähbitli, dünýä ähmiýetli işleriniň hemişe rowaçlyklara beslenmegini arzuw etdiler.
