MUGALLYMLARYMYZ BALYK HOJALYGY PUDAGYNYŇ III HALKARA YLYM-BILIM FORUMYNA GATNAŞDYLAR
16514 — 21-nji sentýabr aralygynda S.A.Nyýazow adyndaky Türkmen oba hojalyk uniwersitetiniň Weterinar lukmançylygy fakultetiniň Maldarçylyk kafedrasynyň müdiri Saparmyrat Annamuhammedow we mugallymy Wepa Mämiýew Russiýa Federasiýasynyň Sankt-Peterburg şäherinde VII Halkara balyk senagaty forumynyň çäklerinde geçirilen Balyk hojalygy pudagynyň III halkara ylym-bilim forumyna gatnaşdylar.
Mugallymymyz S.Annamuhammedow 17-nji sentýabrda Balyk hojalygy pudagynyň III halkara ylym-bilim forumynda ýurdumyzyň balyk senagatynyň ösüşleri hakynda çykyş etdi. Forumyň çäklerinde iş tejribeleri, balykçylygyň ösüşi, ýerli balyklaryň ýagdaýy, görnüşleri, uýgunlaşdyrylan balyk görnüşleri, biodürlüligi gorap saklamak babatynda alnyp barylýan işler barada pikir alşyldy.
18-nji sentýabrda Russiýa Federasiýasynyň balykçylyk hojalyklarynyň, jemgyýetleriniň, kompaniýalarynyň, okuw merkezleriniň üstünlikleri, ýeten sepgitleri şöhlelendirilen sergä barlyp görüldi. Onda balyk tutmak, arassalamak, duza ýatyrmak, kakatmak, balyk etini taýýarlamak, balyklardan işbil almak we olary ekologik taýdan arassa gaplara gaplamak boýunça tehnologiýalar, balyk etinden taýýarlanan konserwalaryň görnüşleri, balyk tutmaga niýetlenen gämiler, enjamlar we beýlekiler görkezildi. Sergide forel balyklaryny ösdürip ýetişdirmek üçin ýapyk suw üpjünçilik gurnamasynyň görkezilmegi, şeýle hem deňiz önümleriniň we balyk önümçiliginde peýdalanylýan enjamlaryň, gämileriň bolmagy köpleriň ünsüni çekdi.
Uniwersitetimiziň wekilleri VII Halkara balyk senagaty forumynyň umumy mejlisine, ýapylyş dabarasyna gatnaşdylar. Şeýle-de olar üçin Sankt-Peterburg şäherine gezelençler guraldy.
Ýazmyrat HOJYMYRADOW,
S.A.Nyýazow adyndaky Türkmen
oba hojalyk uniwersitetiniň Weterinar
lukmançylygy fakultetiniň Zootehniýa
taýýarlyk ugrunyň 1-nji ýyl magistranty.
