Uniwersitetimiziň zenan mugallymy bäsleşigiň baş baýragyna mynasyp boldy
549Berkarar döwletiň täze eýýamynyň Galkynyşy döwründe milli gymmatlyklarymyza, däp-dessurlarymyza, şöhratly ata-babalarymyza, mährem enelerimize we gelin gyzlarymyza goýulýan belent sarpa Milli Liderimiziň we Arkadagly Serdarymyzyň alyp barýan beýik işlerinde aýdyň duýulýar. Kalby watançylyk duýgusyndan ruhlanýan agzybir türkmen halkymyzyň her bir güni taryhy wakalara, dabaralara beslenýär. 2023-nji “Arkadag Serdarly bagtyýar ýaşlar ýyly” diýip atlandyrylmagy hem-de Ahal welaýatynyň täze, döwrebap edara ediş merkezine “Arkadag” adynyň dakylmagy mynasybetli, Hormatly Prezidentimiziň zenanlara goýýan sarpasyna jogap etmek we zenanlaryň başarnygyny hem-de ukybyny açyp görkezmek maksady bilen, Türkmenistanyň Zenanlar birleşiginiň Merkezi Geňeşi tarapyndan watanymyzyň hem halkymyzyň öňünde guwandyryjy işleri bitirýän, öňdebaryjy zenanlaryň arasynda “Ýylyň zenany” bäsleşigi yglan edilip, ýakynda şol bäsleşigiň Aşgabat şäher tapgyry geçirildi.
Bu bäsleşikde gözel paýtagtymyzdan ukyply, işeňňir gelin-gyzlar öz aralarynda ýedi ugur boýunça bäsleşdiler. S.A.Nyýazow adyndaky Türkmen oba hojalyk uniwersitetimiziň mugallymlary we talyp gyzlary bu bäsleşige gatnaşyp, “Obany ösdürmekde bitiren hyzmatlary üçin” diýen ugur boýunça üstünlikli çykyş etdiler. Uniwersitetimiziň mugallymy Maral Orazowanyň oba hojalygyny ösdürmekde goşýan goşandy, taýýarlaýan ýaş hünärmenleri baradaky wideo maglumatlary, häzirki wagta çenli alyp baran işleri baradaky fotosuratlary we ýokary derejedäki çykyşy emin agzalar tarapyndan ýokary bahalandyryldy. Şeýlelikde, bäsleşikde baş baýraga we “Ýylyň öňdebaryjy oba zenany” adyna uniwersitetimiziň Ekologiýa kafedrasynyň mugallymy Maral Orazowa eýe boldy. Bäsleşikde II orna Dänäni gaýtadan işlemek hünäriniň 1-nji ýyl talyby Aýjahan Magtymgulyýewa mynasyp boldy.
Biz hem zehinli mugallymymyzyň “Ýylyň zenany” bäsleşiginiň döwlet tapgyrynda üstünlikli çykyş edip uniwersitetimize baýrakly orny getirer diýip ynam edýäris. Gahryman Arkadagymyzyň hem-de Hormatly Prezidentimiziň zenanlara goýýan hormaty, döredip berýän ähli mümkinçilikleri üçin köp sagbolsun aýdýarys. Milli Liderimiziň hem-de Arkadagly Serdarymyzyň janlary sag bolsun, ömürleri uzak bolsun, alyp barýan halk bähbitli döwletleri işleri rowana ýollarda rowaçlyklara beslensin.
Gülnar Ahmedowa,
S.A.Nyýazow adyndaky Türkmen oba hojalyk uniwersitetiniň
ilkinji zenanlar guramasynyň başlygy
