Uniwersitetimizdäki täzelikler

Garaşsyzlygymyzyň geçen 30 ýylynyň içinde Türkmenistanyň başlangyjy boýunça başy başlanan, Birleşen Milletler Guramasynyň Baş Assambleýasynyň gelen netijesi esasynda 17 sany Kararnama kabul edildi. Şol bir wagtyň özünde döwletimiz Birleşen Milletler Guramasynyň 11 sany toparynyň, komitetleriniň we geňeşleriniň agzasy bolup durýar we olaryň çäklerinde birnäçe maksatnamalary üstünlikli durmuşa ornaşdyrýar.

Halkyň Arkadagly zamanasy ýylynyň aprel aýynyň 22-sinde Hormatly Prezidentimiz Ministrler Kabinetiniň sanly ulgam arkaly nobatdaky mejlisini geçirdi. Mejlisiň dowamynda Birleşen Milletler Guramasynyň Ženewadaky edarasynyň ýanyndaky Türkmenistanyň hemişelik wekilhanasyndan ýene-de bir hoş habaryň Birleşen Milletler Guramasynyň Baş sekretarynyň orunbasary, Birleşen Milletler Guramasynyň Ýewropa ykdysady komissiýasynyň Ýerine ýetiriji sekretaryndan bu gurama tarapyndan yglan edilen “Şäherlerdäki baglar” atly başlangyjyna bag ekmek çäreleri arkaly goldawy we oňa goşan goşandy üçin Aşgabat şäherine halkara güwänamanyň berlendigi barada hoş habar gelip gowuşdy.

Arkadagly Serdarymyz hemmeleri bu halkara güwänamanyň berilmegi bilen gutlap: “Köp ýyllaryň dowamynda Hormatly Arkadagymyzyň başlangyçlary esasynda Türkmenistanda 145 milliondan gowrak bag nahaly ekildi. Bu iş ýurdumyzda aýratyn howa zolaklarynyň emele gelmegini üpjün etdi we sebitde arassa howanyň ýokary derejede bolmagyna, tebigatyň abat saklanyp galmagyna goldaw berýär” diýip belledi.

Eziz Diýarymyzda Türkmen bedewiniň milli baýramynyň toýlanylýan günlerinde bu hoş habaryň gelip gowuşmagy halkymyzyň şatlygyna şatlyk goşdy.

Gelip gowşan hoş habar mynasybetli 25-nji aprelde ýurdumyzyň baýry ýokary okuw mekdebi bolan S.A.Nyýazow adyndaky Türkmen oba hojalyk uniwersitetinde professor-mugallymlaryň hem-de talyp ýaşlaryň gatnaşmagynda dabaraly maslahat geçirildi.

Maslahatda çykyş eden mugallymlar öz çykyşlarynda Türkmenistan Birleşen Milletler Guramasynyň Daşky gurşawy goramak barada maksatnamasy we beýleki abraýly halkara guramalar bilen birlikde tebigaty goramak ulgamynda iri taslamalaryň yzygiderli durmuşa geçirilýändigini nygtadylar. Şunuň bilen bir hatarda häzirki wagtda ýurdumyzda ekologiýa ulgamyna degişli Türkmenistanyň Kanunlary döwrebaplaşdyrylyp, olaryň täze rejelenen görnüşleri “Ozon gatlagyny goramak hakynda”, “Balyk tutmak we suwuň biologiki serişdelerini gorap saklamak hakynda”, “Aýratyn goralýan tebigy ýerler hakynda”, “Ösümlik dünýäsi hakynda”, “Haýwanat dünýäsi hakynda”, “Tebigaty goramak hakynda”, “Ekologiýa seljermesi hakynda”, “Galyndylar hakynda”, “Ekologiýa auditi hakynda” we Türkmenistanyň tokaý kodeksiniň kabul edilendigini bellediler.

Tebigy serişdelerden tygşytly we ýerlikli peýdalanmak daşky gurşawyň ýagdaýyna täsir edýär. Tebigy gurşawda bolup geçýän özgermeler (hadysalar) bolsa adamyň özüne we ýaşaýyş şertlerine öz täsirini ýetirýär. Şonuň üçin häzirki wagtda tebigatdan rejeli we aýawly peýdalanmak möhüm ähmiýete eýe bolup durýar. Şundan ugur alnyp, eziz Diýarymyzda tebigatdan rejeli peýdalanmagy we onuň baýlyklarynyň goralyp saklanylmagyny üpjün etmäge gönükdirilen çäreler üstünlikli durmuşa geçirilýär.

Gahryman Arkadagymyzyň başlangyçlary bilen halkyň saglygy hakyndaky alada, adamlaryň bagtyýar durmuşy üçin ähli şertleriň döredilmegi Berkarar döwletiň täze eýýamynyň Galkynyşy döwründe Arkadagly Serdarymyzyň alyp barýan syýasatynyň möhüm ugurlarynyň biri bolup durýar. Amala aşyrylýan özgertmeleriň, Türkmenistanda durmuşa geçirilýän milli Maksatnamalaryň we ägirt uly taslamalaryň özeninde döwletimiziň we jemgyýetimiziň baş gymmatlygy hasaplanýan adamyň saglygy baradaky alada esasy işleriň biri bolup durýar.

Jemgyýeti öwreniş ylymlary

kafedrasynyň mugallymy

Akynýaz Sapargeldiýew