TÜRKMEN BEDEWLERINIŇ ŞANYNA BAÝRAMÇYLYK DABARASY
448Golaýda S.A.Nyýazow adyndaky Türkmen oba hojalyk uniwersitetinde ýurdumyzda uly dabara bilen bellenilýän Türkmen bedewiniň milli baýramy mynasybetli halkymyzyň milli buýsanjyna öwrülen behişdi ahalteke bedewlerimize bagyşlanan aýdym-sazly baýramçylyk konserti geçirildi. Onda uniwersitetiň «Altyn asyr» medeniýet merkeziniň talyplary ata Watanymyzyň belent sepgitlerine, milli gymmatlyklarymyza, şol sanda türkmen bedewlerine bagyşlanan edebi-sazly çykyşlary, aýdym-sazlary, tanslary ýerine ýetirdiler.
Uniwersitetiň toý bezegli meýdançasynda konsert bilen ugurdaş türkmen milli oýunlary, sport ýaryşlary, türkmen bedewlerine, oba hojalygyna bagyşlanan sergiler guraldy.
Dabarada edilen çykyşlarda toý şatlygyny goşalandyran hoş habarlar — Gahryman Arkadagymyzyň Özbegistan Respublikasynyň «Ýokary derejeli dostluk» ordeni bilen sylaglanylmagy, Arkadagly Gahryman Serdarymyza Sukuba uniwersitetiniň hormatly doktory akademiki derejesiniň berilmegi mynasybetli gutlaglar beýan edildi. Golaýda hormatly Prezidentimiziň Ýaponiýa ilkinji saparynyň, Milli Liderimiziň Gazagystan Respublikasyna, Gyrgyz Respublikasyna, Özbegistan Respublikasyna dostlukly saparlarynyň ykdysadyýetiň dürli pudaklaryny, şol sanda oba hojalyk pudagyny ösdürmekde örän netijeli bolandygy uly buýsanç bilen bellenildi.
Pälwan ORAZMYRADOW,
S.A.Nyýazow adyndaky Türkmen
oba hojalyk uniwersitetiniň dokma önümçiligi
fakultetiniň pagtanyň ilkinji işlenilişi
hünäriniň 4-nji ýyl talyby.
